Comercio de Maniños

Ola a tod@s!!

   O alumnado do 1ºciclo de Primaria foi coñecer de primeira man o comercio de Maniños. Baixaron content@s. O sol acompañaba. Volveron aínda máis content@s (e iso que o camiño de volta é todo costa arriba!). Vese que @s trataron ben. Moi, moi ben, diría eu.

Ronroneos e miañadiñas

Mica Bigotes

Espeleoloxía

Ola a tod@s!!

   Sabiades que o alumnado do 3º ciclo recibiu unha charla de espeleoloxía? Díxomo o Rato Gordecho. Estivo a cargo da Federación Galega, que se ocupa de realizar actividades de formación, divulgación e respecto polo medio subterráneo. Disque resultou interesantísimo todo canto falaron. Onde andaría eu metida, para perderme isto? Miau! Seguro que xusto ese día non chovía e fun dar unha voltiña polo bosque...

Ronroneos e miañadiñas

Mica Bigotes

Andaina por Magalofes

Ola a tod@s!!

   O venres, a pesares da chuvia, tivemos unha saída fantástica. Fumos ata a parroquia de Magalofes para ver os hórreos. Visitamos tamén un lavadoiro e un muíño. É importante coñecer o noso patrimonio e aprender a poñelo en valor.

Ronroneos e miañadiñas

Mica Bigotes

Aloia, Nuria e Nahia

Ola a tod@s!!

   Que ben o pasaron hoxe as nenas e nenos de Infantil na Hora de Ler! Aloia axudou a súa mamá a contar un conto superchulo, Nahia deixouse aloumiñar canto quixeron e, para rematar, fixeron un colorido experimento! Xenial!

Moitas grazas, Nuria!

Ronroneos e miañadiñas

Mica Bigotes

Hidden Folks

Ola a tod@s!!

   O xogo dos obradoiros de ficción dixital deste trimestre é Hidden Folks:

 diferente, novedoso, entretido, interesante... 

Ronroneos e miañadiñas

Mica Bigotes

Hórreos. Patrimonio cultural e inmaterial.

Ola a tod@s!!

   O venres tivemos a palestra do proxecto Hórreos. Patrimonio cultural e inmaterial. Este proxecto, planificado polas familias, será presentado ao III Concurso Somos Rural, convocado polas ANPAS Galegas. 

      Podedes acceder a información máis completa no seguinte enlace:

https://www.radiofusion.gal/actualidade/novas/elemento-peculiar-da-paisaxe-galega?fbclid=IwY2xjawJLjzZleHRuA2FlbQIxMAABHTj8ONjIvtecm2e4HA9AQL1ieLgzDtrkEI_OOGawVZPh5KD9huCWWt2Lcg_aem_TuMQKoxJyju74P28_QU46w

Ronroneos e miañadiñas

Mica Bigotes

Día da Árbore

Ola a tod@s!!

   Nin a chuvia constante foi quen de deslucir as actividades do Día da Árbore. Acompañáronnos os gardas forestais, a "policía do monte", cos seus impresionantes vehículos (a motobomba, un éxito total). Explicaron en que consiste o seu traballo, falaron da importancia de coidar as árbores e os animais do monte, realizaron demostracións do funcionamento de diferentes instrumentos, plantamos carballos...

Se chove..., que chova!

Ronroneos e miañadiñas

Mica Bigotes

Día da Síndrome de Down

Ola a tod@s!!

   O 21 de marzo é un día moi especial, non só damos inicio á primavera, senón que tamén celebramos o Día da Poesía, o Día da Árbore, o Día Mundial da Síndrome de Down. Nunca faltamos a esta última cita: co sinxelo xesto de traer os calcetíns diferentes, lembramos a importancia de continuar avanzando no camiño da plena inclusión.

Ronroneos e miañadiñas

Mica Bigotes

Poesía

Ola a tod@s!!

   Marzo é poesía. O noso recital poético resultou todo un éxito. Non hai micro que lle poña medo aos nosos nenos e nenas! Temos un berce de artistas! Miau!

Ronroneos e miañadiñas

Mica Bigotes

Nais que len

Ola a tod@s!!
   Ás veces, cando as mamás veñen ler, hai tanta actividade na biblioteca que teñen que quedar nas aulas. Tanto ten! Á mamá de Xenxa pasoulle isto, mais... a clase de Infantil é un lugar estupendo para ler, non si?

Moitas grazas por vir! 

Que orgullo de familias!

Ronroneos e miañadiñas

Mica Bigotes

Acompañamento lector

Ola a tod@s!!

   A rapazada do 3ºciclo continúa lendo para os pequerrechos. Canto gozan grandes e pequenos destes momentos de biblio compartida!

Grazas, Lenda! Grazas, Miriam!

Sodes un exemplo a seguir!

Ronroneos e miañadiñas

Mica Bigotes

Club de lectura

Ola a tod@s!!

   Nesta tarde de mércores tivo lugar a terceira sesión do club de lectura de adultos. Foi, sen dúbida, unha tarde agradable na compaña dunha muller poderosa e afouta, como tantas outras mulleres galegas,  que loitaron (e venceron coa forza do seu carácter e o seu inmenso esforzo e traballo continuo) contra a adversidade e as dificultades da vida no duro camiño da emigración.

Ronroneos e miañadiñas

Mica Bigotes

Mateo e Bregán

Ola a tod@s!!

   Non sabedes canto me présta cando, dende o meu agocho, os pillo tan concentrados na lectura, que nin se enteran de que ando por alí! Miau!

Ronroneos e miañadiñas

Mica Bigotes

Unha tarde monstrosa!

Ola a tod@s!!

   Temos expostos os marabillosos traballos que as familias realizaron nesa divertida e monstrosa tarde da que gozaron grazas a Sabela Gago. Podedes ver que foi todo un exercicio de creatividade. E non so fixeron isto!!! Deixaron na biblio un monstroso libro colaborativo!!!

Moitísimas grazas, Sabela! Foi todo un pracer poder contar contigo!

Ronroneos e miañadiñas

Mica Bigotes

Grazas, Lidia!

Ola a tod@s!!

   Lidia e Maré, Maré e Lidia, contaron na nosa biblio curiosidades ben interesantes de aves que son diferentes das que acostumamos ver por aquí. Os seus hábitats naturais están en lugares afastados. Todo o grupo gozou moito desta actividade.

 Moitas grazas ás dúas e parabéns por tan boa explicación! Miau!

Ronroneos e miañadiñas

Mica Bigotes

8M. As nosas aulas

Ola a tod@s!!

   Queremos que todas as nosas aulas leven nome de muller, de muller galega, de mulleres galegas que, en diferentes ámbitos, sexan relevantes. Desta vez, tocoulle á clase de música. As candidatas propostas eran todas elas ben merecedoras de conseguir este pequeno recoñecemento, mais.... as gañadoras (por abrumadora maioría) foron:

Fillas de Cassandra

Ronroneos e miañadiñas

Mica Bigotes

8M. Mulleres de Os Casais

Ola a tod@s!!

   No 8M deste curso recibimos, con moitísima alegría, a María López Seco, alumna (noutros tempos. Miau!) deste cole. Contounos a súa experiencia como graduada en Medicina, a importancia de que as mulleres esteamos en todos os ámbitos, tanto sociais como profesionais, falounos de mulleres pioneiras  e da responsabilidade persoal de loitar pola nosa vocación sen ter en conta os prexuizos. Mudar as cousas cara a igualdade é un camiño que nos compete a todos; non podemos desistir, hai que andar e andar e andar pese aos muros que atopemos no camiño. Moitas grazas, María, por achegarte a estar con nós! Querémoste!

8M- Pola IGUALDADE

Ronroneos e miañadiñas

Mica Bigotes

Familias que len, nenos e nenas que len.

Ola a tod@s!!

   Sempre é unha alegría recibir na nosa biblio nais que veñen ler. Os nenos e nenas gozan moitísimo destes momentos compartidos. Grazas, Verónica!

Ronroneos e miañadiñas

Mica Bigotes

Remata o Entroido

Ola a tod@s!!

   Aló vai o Entroido deste 2025! O noso, resultou de cine! Miau!

Ronroneos e miañadiñas

Mica Bigotes

Día de Rosalía 2025

Ola a tod@s!!

   Un ano máis celebramos o noso tradicional recital poético como homenaxe a Rosalía de Castro. De novo, sumámonos á proposta da Asociación de Escritoras e Escritores en Lingua Galega.  O lema escollido para este curso foi: #SaudeeTerra!

  O alumnado do 3ºciclo ocupouse de ler o manifesto; as familias que compartiron con nós tan fermosa celebración, recitaron poemas da autora xunto cos seus fillos ou fillas; algunhas puxéronlles música; todos e todas cantamos a canción que o voluntariado de biblioteca preparou coa axuda da IA e entregámoslle a Rosalía o noso corazón.

   E, por suposto, coma sempre, todos os nenos e nenas e todos os familiares presentes, recibiron un libro en galego e unha flor.

     O Rato estaba nervioso. Eu, tamén. Foi un día intenso, pero ben bonito.

                                                                    Ronroneos e miañadiñas

Mica Bigotes

Somos os monstros

Ola a tod@s!!

   Hoxe algúns dos nosos "monstros pequenos"  gravaron varias escenas da obra teatral "Somos os monstros", nada máis e nada menos que coa propia autora, a nosa querida madriña Paula Carballeira. Aprenderon de forma divertida, cousa ben sinxela con un "monstro grande" tan divertido e que tanto sabe.

Ronroneos e miañadiñas

Mica Bigotes

Lucas Ramada nos Casais

Ola a tod@s!!

   Hoxe a nosa biblio tivo o privilexio de recibir a Lucas Ramada, o máis grande experto en ficción dixital. Compartiu tempo e coñecementos cos nenos e nenas, coas familias e co profesorado. Somos todos principiantes (agás el, claro) e estamos iniciándonos nun medio no que é moito o que nos queda por aprender; facelo da man de quen máis sabe, danos a seguridade de que os pasos que imos dando poderán ser pequenos, pero serán correctos.

Grazas, Lucas, pola túa presenza, pola dispoñibilidade, cercanía e simpatía.

Ronroneos e miañadiñas

Mica Bigotes

Lectura, lectura e lectura.

Ola a tod@s!!

   Esta semana a profe Dely foi ler á clase de 4º de Primaria. Estas Horas de Ler diferentes gústanlles moito a todos os nenos e nenas, sen diferenzas de curso. Igual ten que sexan grandes ou pequenos; sempre reciben con agrado ao mestre ou mestra que chega de sorpresa. 

Ronroneos e miañadiñas

Mica Bigotes

Creatividade

Ola a tod@s!!
   Co material dos Polos estamos dándolle novos pulos á creatividade. Aprenden, divírtense, investigan, crean... Marabilloso!

Ronroneos e miañadiñas

Mica Bigotes

Lectura e familias

Ola a tod@s!!
   Sempre é motivo de alegría e de moita satisfación para a nosa biblio cando as familias veñen compartir lecturas cos nenos e nenas. Cando veñen ler para os cursos máis altos, alegría e satisfación son dobres. Sabemos que é moitísimo máis difícil "atreverse". Así que, moitísimas grazas; un precer terte con nós.

Ronroneos e miañadiñas

Mica Bigotes

Candeloria 2025

Ola a tod@s!!

   Este curso namoramos de... o teatro. Non podía ser doutra maneira, verdade?

(Lembrade que medio inverno está aínda por pasar)

Ronroneos e miañadiñas

Mica Bigotes

Mércores, queridos mércores...

Ola a tod@s!!

   Un día máis, as nenas maiores viñeron á biblio a lerlle un conto ás clases dos pequerrechos. Ninguén quere perderse este momento compartido. Ai..., mércores, queridos mércores... O Rato Gordecho e máis eu gozamos moito de velos xuntos ao redor dunha boa historia.

Ronroneos e miañadiñas

Mica Bigotes

Mulleres de Os Casais

Ola a tod@s!!

   Para traballar o Día Internacional da Muller e da Nena na Ciencia contamos coa presenza dunha persoa moi especial: Gema, ex-alumna do noso cole. Con ela inauguramos o que esperamos que sexa un proxecto de longo percorrido: Mulleres de Os Casais.  

   Gema é enxeñeira aeroespacial e máster en aeronáutica. Na actualidade traballa na construción de drons. Imaxinade canto interese despertou en toda a rapazada! Non paraban de preguntar!

   Deixou ben claro que Nenas e Ciencia = Binomio perfecto.

   Accedeu a ser entrevistada na nosa radio. Podedes escoitala máis abaixo.

   (Non vou dicir nada do emocionadas e orgullosas que estaban as súas antigas profes).

  

Ronroneos e miañadiñas

Mica Bigotes

Inclusión

Ola a tod@s!!
   Na aula de 4º estiveron traballando sobre inclusión. Como remate, deseñaron un escudo e planificaron actividades que presentaron no 41Concurso escolar ONCE.

  Esta é a audiodescrición que presentaron, para que o escudo sexa accesible para persoas invidentes. Non deixedes de escoitala! Eu non me canso de oíla.

Ronroneos e miañadiñas

Mica Bigotes

Ficción dixital

Ola a tod@s!!

   Continuamos cos obradoiros de ficción dixital. Non só xogan, divírtense e aprenden a gozar de videoxogos de calidade, senón que destes obradoiros surden novas actividades. Por exemplo, na clase de 4º de Primaria, optaron pola escritura creativa e inventaron historias que quixeron compartir coas outras clases.

Ronroneos e miañadiñas

Mica Bigotes

Libros e lectura

Ola a tod@s!!
   Seguimos dándolle un vistazo preliminar aos novos fondos. Parece que os acollen ben! Miau!

Ronroneos e miañadiñas

Mica Bigotes

Nós tamén contamos

Ola a tod@s!!
   Somos moi conscientes da importancia da lectura e tamén da impronta que deixa o exemplo; por iso, nós tamén contamos. Grazas, profe Lorena!

Ronroneos e miañadiñas

Mica Bigotes

Somos contacontos

Ola a tod@s!!
   Esta semana tocoulles a quenda de lectura a Hugo e Uxía. Os pequerrechos de Infantil e as nenas e nenos de 1º gozaron coas peripecias do rato de campo e o rato da cidade. Encantoulles!

Ronroneos e miañadiñas

Mica Bigotes

Manifesto pola PAZ

Ola a tod@s!!

   Hoxe realizamos un pequeno acto para conmemorar o Día da Paz que, como todos sabedes, celébrase o día 30 de xaneiro. Os nenos e nenas de 5º e 6º leron varios manifestos que prepararon para que todo o resto de alumnado comparta con eles os seus desexos de futuro e os seus compromisos pola paz. Moitas grazas, rapazada!

Ronroneos e miañadiñas

Mica Bigotes

Os nosos expertos

Ola a tod@s!!
   Esta exposición sobre o mar está conseguindo que os nosos nenas e nenas se fagan expertos no tema. Miau!

Ronroneos e miañadiñas

Mica Bigotes

Plan Director

Ola a tod@s!!

   Non falara aínda neste curso do Plan Director e pode que alguén pensara que neste curso non había. Si que temos Plan Director e con el as nenas e nenos maiores reflexionan e aprenden sobre igualdade, sobre o acoso escolar e sobre a necesidade de protexerse ante os riscos da Rede e de facer uso dela con responsabilidade.

Ronroneos e miañadiñas

Mica Bigotes

Corazóns de Paz

Ola a tod@s!!
   Hoxe rematamos a actividade da Paz que realizaron os equipos de biblioteca. Vai quedar ben chulo o mural que fagamos con tan fermosos corazóns de paz.

Ronroneos e miañadiñas

Mica Bigotes

Día da Educación

Ola a tod@s!!

   Nesta data significativa quixemos que os nenos e as nenas gozaran do que todos os nenos e nenas do mundo deberían gozar: o xogo. A estas idades ninguén debería estar traballando, tería que estar na escola ou estar xogando.

   A nosa biblioteca creativa organizou esta sesión con Brazolinda e os seus divertidos xogos de mesa artesanais en galego. Un éxtito total, como cabía esperar.

Ronroneos e miañadiñas

Mica Bigotes

24 de xaneiro

Ola a tod@s!!

   Un ano máis reivindicamos o dereito a unha educación de calidade para todas as persoas do mundo. Non esquezamos nunca que a educación é a maior forza transformadora. O lema que empregamos este curso foi:

Poñamos a educación no mapa

Ronroneos e miañadiñas

Mica Bigotes

Convivencia. Bo trato. Paz.

Ola a tod@s!!

   Continuamos co traballo dos equipos de biblioteca. Van 7; quedan outros 3. Miau!

Ronroneos e miañadiñas

Mica Bigotes

Somos contacontos

Ola a tod@s!!
   Gústame moitísimo que veñan á biblio grandes e pequenos xuntos. Se por riba é para lerlles aos outros, aínda me gusta máis. Compartir boas lecturas non ten prezo. Miau!

Ronroneos e miañadiñas

Mica Bigotes

Equipos de biblioteca

Ola a tod@s!!

   Hoxe empezamos unha nova actividade por equipos. Estamos en xaneiro e cómpre traballar a paz. Nesas estamos. Foron catro os equipos que realizaron hoxe o seu traballo. Ao longo da semana iremos sumando corazóns de paz. Miau!

Ronroneos e miañadiñas

Mica Bigotes

Exposición

Ola a tod@s!!

    Hoxe quedou montada esta exposición tan chula que veu do CEIDA. Fala do mar, do noso mar, desas ribeiras nosas que tanto temos que coidar e da moita riqueza que  elas nos aportan. Canto imos aprender!

 

Ronroneos e miañadiñas

Mica Bigotes

Novidades

Ola a tod@s!!

   Os novos libros que, dentro de nada, van pasar aos andeis da biblio para que os poidan levar a casa, están expostos na entrada do cole. E, mentres non van para arriba, as nenas, os nenos, o Rato e máis eu, gozamos deles. Andamos folleando para ver cal nos interesa, cal é divertido, cal deles mete medo... Seguro que nos máis deles imos atopar historias que quereremos ler. E máis dunha vez!

Ronroneos e miañadiñas

Mica Bigotes

Mochilas Viaxeiras

Ola a tod@s!!

   Novo ano, pero todo igual. Alá van as mochilas deste segundo trimestre e podedes ver con canta alegría as reciben. Marchan para a casa felices; e o Rato e máis eu quedamos na biblio contentiños coma un allo. Coma dous allos, perdón (Miau).

Ronroneos e miañadiñas

Mica Bigotes